Isang Pulis ng Iba, Zambales : “Mas mabuti pang pumatay kesa mag sindi ng Marijuana.”

By: Talampunay Cindycat

 Bakit ganito ang paniniwala ng mga tao sa Marijuana? Lalong-lalo na sa isang pulis na dapat ay nagtatanggol sa kaligtasan ng buhay ng tao at ng bayan?

Bakit ito lumabas sa bibig ng isang pulis ng Iba, Zambales? Ibig sabihin ba nito ay pumatay na siya ng taong nang-alok sa kaniya ng smoke?

Gusto mo pumatay ng tao? Kumitil ng buhay? Kesa mag sindi ng dahon na walang nasasaktan o nawawalan ng hininga?

Ilan sa mga nahuli nitong kaganapan sa 420 Philippines ng Iba, Zambales ay hindi nahulihan ng Cannabis sa katawan at negatibo sa Drug Test, ngunit kinulong parin at sinampahan pa ng:

Sec. 13. Possession of Dangerous Drugs During Parties, Social Gatherings or Meetings.

Sec. 14. Possession of Equipment, Instrument, Apparatus and Other Paraphernalia for Dangerous Drugs During Parties, Social Gatherings or Meetings.

Sec. 15. Use of Dangerous Drugs. A person apprehended or arrested, who is found to be positive for use of any dangerous drug, after a confirmatory test,

Ang ginawang panghuhuli ng mga pulis ay isang kabalbalan.

Hindi lahat ng nahuli ay positibo sa Drug Test!

Ang mga hinuli nila ay tahimik na nakaupo sa kani-kanilang lugar. Hindi nag-aamok. Hindi nagwawala. Hindi sumisigaw. Hindi nag-iingay.

Ang mga pag huli nila ay tila isang “Minnie-minnie-my-ni-mo.”

Malas mo na lang kung na-target ka ng mga mata nila. Swerte mo kung alerto ka at makakaiwas o makakatakas ka pag parating na sila.

Ngunit ang paghuli nila ay dalawahan o tatluhan. At bigla ka nalang tutuhuran, ipoposas, kakapkapan at sasabihang: “Mas mabuti pang pumatay kesa mag sindi ng Marijuana.”

Mismong mga testimonya ng mga pulis na humuli ay magkakaiba na ang impormasyon.

Dahil ba gumawa lang kayo ng kaniya-kaniyang kwento at hindi naman talaga ganoon ang nangyari?

Eleven minus eleven equals eleven? (11-11=11???)

Kahit ang judge ng korte ay nagtataka kung bakit pinayagan pa mismo ang ganitong pagtitipon sa lugar ng Iba, Zambales kung alam na ng mga kapulisan na tungkol sa Cannabis ang 420 Philippines.

Pinayagan lang kaya ito ng lugar dahil alam nilang kikita sila ng pera kung marami silang huhulihin?

Sampu (10) na lamang silang natitira ngayong ikalawang linggo ng Mayo. May nagiisang babae ang nasama sa pag “hulidap” ng mga pulis at hanggang ngayon ay kasama siya sa sampung natitira.

Mayroon ding pag hihiwalay na kaso sa isang korte.

Delaying tactics ba ito?

Ang mga naunang nag piyansa ay nag bayad ng halagang Php 100,000.00 na umaabot pa sa Php 420,000.00. Kasama na rito ang dalawang banyaga.

Ang mga naganap na hulihan noong 20 ng Abril sa Beach ni Chabeng ay isang paglabag sa karapatang pantao.

Hindi mo maaaring bugbugin ang hinuhuli mo kung hindi naman pumapalag o nag aamok. Hindi mo maaring kapkapan ang tao ng biglaan lang at kung kelan mo gusto.

At bakit mo pupulutin at ikukulong ang taong wala namang inaagrabyadong kapwa?

Kaya ba “Iba” ang pangalan ng “Iba, Zambales” dahil “iba” ang sistema ng paghuli dito?

Tama bang may makulong ng higit sa dalawang taon dahil sa 20 pesos lang na damo?

Isang napakalaking kamalian ang nangyayaring ganito sa Pilipinas. Marami ng pamilya ang nawasak dahil sa mga maling kaalaman at isip ng masang Pilipino tungkol sa Cannabis.

Marami ng nasirang mga plano sa buhay dahil sa maling pag tingin sa mga nagsisindi ng Cannabis.

Mas marami pang namatay at nag away sa impluwensya ng alcohol!

Napatunayan na rin na nakaka-kanser at kung ano-ano pang sakit ang makukuha sa yosi!

Ngunit bakit legal ang alkohol at yosi sa buong mundo?

Panahon na para umapila.

Panahon na para umaksyon.

Hindi lang ang mga nakakulong sa Zambales ang biktima ng maling sistema at pag iisip ng matandang kultura ng Pilipinas.

Ang batas ng isang bansa ay maaaring baguhin o burahin. Maaari ring mag pasa ng isang ideya kung paano mapapaganda ang hustisya sa Pilipinas.

Dapat lang imulat ang mata ng nakararami na hindi kriminal ang mga nagsisindi ng Cannabis.

Dapat ipaalam na napakarami rin nitong benepisyo sa katawan, sa planeta, at sa iba’t ibang industriya pati na rin sa larangan ng medisina.

Kailangan nating kumilos para mabago ang pagtingin sa Cannabis, sa mga nag sisindi nito at sa mga akala nilang masamang epekto nito.

Kailangan nating mapansin sa lalong madaling panahon.

Legal na ang Cannabis sa ibang bansa!

At wala namang mga balita na tumataas ang krimen pag pinayagan ng batas na ang pagkakaroon, pagtatanim o pagsisindi ng Cannabis.

Higit sa lahat.

 Hindi maaring dumami pa ang taong magsasabing:

“Mas mabuti pang pumatay kesa mag sindi ng Marijuana.”